Xalqaro bolalarni himoya qilish kuni

 Bolalar ertangi kunimiz. Shunday ekan  ota-ona, o'qituvchi, tarbiyachi va oddiy fuqarolar sifatida vazifamiz bugungi kunda bolalar uchun sog'lom, xavfsiz va baxtli bolalikni ta'minlashdir.  Bolalarning sog’lom rivojlanishining muhim omillaridan biri-sog’lom turmush tarziga rioya qilish, bolalar orasida sport turlariga qiziqishni oshirish va ko’proq  toza havoda vaqt o’tkazish. Tadqiqotlar shuni ko’rsatadiki, bola har kuni 2-3 soat davomida ochiq havoda bo’lishi kerak.

Shu munosabat bilan, O’zbekiston Respublikasi Oliy Majlisining nodavlat notijorat tashkilotlarini va fuqorolik jamiyatining boshqa institutlarini qo’llab-quvvatlash jamoat fondi tomonidan tashkillashtirilgan  va SOS O'zbekiston Bolalar Mahallalarining Xorazm viloyatidagi filiali tomonidan yutib olingan grant asosida bolalarning bo’sh vaqtini mazmunli o’tkazishi, oynashi va dam olishi uchun  bolalar oyin maydonchasi barpo qilindi.

Bolalar maydonchasi  bolalar bo’sh vaqtlarini tengdoshlari va do’stlari bilan mazmunli va qiziqarli o’tkazishi uchun barcha kerakli inventarlar bilan jihozlangan.

Maydonchaning basketbol va voleybol o’yinlari uchun mo’ljallangan qismi bolalarda sport turlariga qiziqishni kuchaytiradi va jismoniy rivojlanishiga hissa qo’shadi. Ota-onalar va bolalar ishtirokida har xil turdagi sport musobaqalar tashkillashtirish orqali ota-ona va bolalar o’rtasidagi munosabatlarni mustahkamlashga zamin yaratadi.

O'yin maydonining ochilish marosimi 2019 yil 1 iyun kuni Xalqaro bolalar kuni munosabati bilan o'tkazildi. Marosimni viloyat hokimi o'rinbosari, viloyat xotin-qizlar qo'mitasi raisi G. Axmedova ochdi. Ochilish marosimida bolalarning kontsert dasturi namoyish etildi va 24 nafar bola ishtirokida  "Quvnoq startlar" estafetasi o’tkazildi. Ikkala jamoa ham esdalik  sovg'alar bilan taqdirlandilar. Ota-onalar va bolalarga bu juda yoqdi, bir olam quvonch bilan ilhomlantirildi! Taqdirlash marosimida bolalar uchun bayram dasturxoni -furshet tashkil etildi.

Tadbir hamkor va homiylar ko'magida bo'lib o'tdi: Urganch shahridagi 1-sonli musiqa maktabi, "Gulzamon" kompaniyasi, Urganch muzqaymoq do'koni va "Malika pardalari" kompaniyasi.